ភ្នំពេញ៖ រដ្ឋមន្ត្រីក្រសួងបរិស្ថានក្រសួងបរិស្ថាន លោក អ៊ាង សុផល្លែត គាំទ្រគំនិតផ្តួចផ្តើមក្នុងការវិនិយោគ ដែលគិតគូរដល់ការកាត់បន្ថយការបំភាយមេតាននៅក្នុងបរិយាកាស។

លោក អ៊ាង សុផល្លែត លើកឡើងដូចនេះក្នុងឱកាសទទួលជួប លោក Andrew Mason នាយកប្រតិបត្តិ ក្រុមហ៊ុន AgCo Tech Australia Pty Ltd របស់ប្រទេសអូស្រ្តាលី នាថ្ងៃទី៣ ខែកុម្ភៈ ឆ្នាំ២០២៤ នៅទីស្តីការក្រសួងបរិស្ថាន។

រដ្ឋមន្រ្តីបរិស្ថាន បានបញ្ជាក់ពីការគាំទ្រដល់ការសិក្សាបង្កើតរោងចក្រចំណីសត្វ ដែលផ្តួចផ្តើមក្នុងការគ្រប់គ្រង និងកាត់បន្ថយឧស្ម័នផ្ទះកញ្ចក់ទៅក្នុងបរិយាកាស។

ទន្ទេមនោះ លោកបានលើកទឹកចិត្តដល់ក្រុមហ៊ុន AgCo Tech យកចិត្តទុកដាក់លើ ការសិក្សាលទ្ធភាពអនុត្តគម្រោង វិនិយោគលើការផលិតចំណីសម្រាប់ សត្វពាហនៈ ដើម្បីជួយបង្កើនផលិតផលក្នុងស្រុក និងរួមចំណែកដល់ការបង្កើនជីវភាពរបស់ប្រជាពលរដ្ឋ នៅតាមសហគមន៍មូលដ្ឋាន ក៏ដូចជាចូលរួមកាត់បន្ថយឧស្ម័នមេតាន ដែលជាឧស្ម័នផ្ទះកញ្ចក់ ដែលបង្កឱ្យមានការប៉ះពាល់ដល់ការប្រែប្រួលអាកាសធាតុ។

គួរឱ្យដឹងដែរថា ឧស្ម័នមេតាន ដែលបានកាត់បន្ថយ គឺជាឥណទានកាបូនដ៏សំខាន់ ស្របតាមការអនុវត្ត វិធានប្រតិបត្តិ មាត្រា៦ នៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ ដែលបានជំរុញនិងលើកទឹកចិត្តដល់កម្ពុជា ក្នុងការធ្វើអាជីវកម្មកាបូនប្រកបដោយតម្លាភាព គណនេយ្យភាព និងស្របតាមស្តង់ដាអន្តរជាតិ៕